News

2017/04/05

”Museums on Fire!” (”Museat bullet!”)

Anders Sunna, Girjas, still here, 2015. Cortesy of the artist.

English version Norsk versjon

OCA OVDANBUKTÁ

”Museums on Fire!” (”Museat bullet!”), lea symposium mii lágiduvvo scenografiija rámmaid siste, ja das leat dáiddalaš oasit

Duorastaga cuoŋománu 20. b. 2017, 12.00–18.00
Bearjadaga cuoŋománu 21. b. 2017, 18.00 rájes

Office for Contemporary Art Norway
Nedre gate 7,
0551 Oslo
www.oca.no I info@oca.no

OCA:s lea gutni ovdanbuktit ”Museums on Fire!” (”Museat bullet!”), symposiuma mii lágiduvvo vuos Oslos ja dasto Kárášjogas. Symposia lágiduvvo scenografiijas, mii lea diŋgojuvvon dađe várás dáiddár Anders Sunnas, ja dasa oassálastet dáiddárat Raven Chacon, Carola Grahn, Geir Tore Holm ja Duane Linklater.

”Museums on Fire!” (”Museat bullet”!) váldá ovdan man láhkai dáiddaásahusat leat lávgalagaid koloniála ja modernisttalaš ideologiijaiguin, mat daid ásahedje, ja bivdá dáiddáriid, kuráhtoriid ja akademihkkariid, geain lea dahje ii leat álgoálbmotduogáš, ovdanbuktit oaiviliiddiset dan hárrái makkár lanjain dahje proseassain berre lahkonit álgoálbmogiid dáiddabarggu ovdal ja dál. Makkár livččii ii-koloniála musea, mo dan vásihivččiimet, makkár jietna das livččii? Leago doarvái viiddidit modernisttalaš dáiddahistorjjálaš kánona ovttaidahttinpolitihkain? Leago musea dakkárin go dat lea, menddo gáidosis álgoálbmogiid geavadiin? Berretgo jurddašit ja bargagoahtit obalohkái ođđa vugiiguin, maiguin nannet ja gaskkustit álgoálbmotdiskurssaid boahtteáiggis?

Álgoálbmottematihkka lea dađistaga ožžon čielgasut saji riikkaidgaskasaš dáiddaarenas. Álgoálbmogiid jienaid háliidit dađistaga gullat eanet biennálain, dáiddárorrumiin, čájáhusain ja dáiddameassuin, ja dáiddaásahusain lea hástalusat lágidit ulbmillaš doaimmaid álgoálbmogiid jurddašanvuogi vuođul. Modeardna ásahusaid problematihka namuhii árrat jo earret eará Kazimir Malevič (1919 teavsttastis musea birra, mas son hálai das makkár fámut luovvanit, go boaldit museaid). Dán áigge jearaldat loktana vuosttažettiin álgoálbmotdáiddáriid dálá dáidaga olis.

Symposiai servet logaldallin Raven Chacon, Carola Grahn, Geir Tore Holm, Anna Hudson, Eva Dagny Johansen, Duane Linklater, Catalina Lozano, Gerald McMaster ja Anne May Olli. Dáiddalaččat loaiddastit Raven Chacon ja Carola Grahn, ja bargguid čájehit Geir Tore Holm ja Duane Linklater. ”Museums on Fire!” (Museat bullet!”) kuráhtorat leat Katya García-Antón, ja Antonio Cataldo, Ida Marie Ellinggard ja Vilge Horvei.

Deaddil dakko, de oainnát ”Museums on Fire!” dárkilis prográmma.

Geir Tore Holma ovdanbuktá symposiai gullevaš dáiddalaš intervenšuvnna Kárášjogas gaskavahku miessemánu 31. b. 2017, ja lágideami ovttasbargit leat Sámi Dáiddaguovddáš ja RiddoDuottarMuseat – sámi museat ja sámi dáiddačoakkáldat Oarje-Finnmárkkus.

Anders Sunna scenografiija lea Oslo symposia maŋŋá čájáhusas, gehččiid olámuttos, OCA lanjain gaskavahkus gitta sotnabeaivái dii. 11.00 - 17.00 (earret miessemánu 17. ja 25. b) gitta geassemánu 25. b. 2017 rádjai.

Eanet dieđuid muitala OCA gulahalli, Tara Hassel.


Oassálastiid birra

Raven Chacon lea komponista, artista ja installašuvdnadáiddár, gii bargá Albuguerques, New Mexicos. Son lea maid Postcommodity‑álgoálbmotdáiddárkollektiivva lahttu. Chacon gullá Navaho-čerdii.

Eva Dagny Johansen lea Álttá musea kuráhtor ja lea Oslo universiteahta IKOS:a PhD-stipendiáhtta. Johansen lea norgalaš.

Carola Grahn lea johkamohkkilaš dáiddár, gii konstruere ja dekonstruere sosiála relašuvnnaid ja nu geahččala áddet addojuvvon rollaid, makkár oktavuohta dain lea individuála iešgovvii ja mo dat seammás váikkuhit servodahkii. Grahn lea sápmelaš.

Geir Tore Holm lea dáiddár ja pedagoga, ja berošta das makkár vuorrováikkuhus lea olbmo ja birrasa gaskka, eanandoalu ja eallima gaskka. Holm lea sápmelaš.

Anna Hudson lea Kanada dáiddahistorjjá ja kuráhtorlohkamiid vuosttašamanuensis York Universitys, Kanadas. Son jođiha dál Mobilizing Inuit Cultural Heritage (MICH), mii lea dutki/luovvalas ovttasbargu, mas guhtta jagi (2012–2018) barget inuihtaid máhtu, kultuvrra ja luovvalasvuođa ođđasit olahemiin, gáhttemiin, dokumenteremiin, ovddidemiin ja gaskkustemiin. Hudson lea kanadalaš.

Dáiddár ja kuráhtor Jonathan Jones barggai muhtun jagiid the Art Gallery of South Walesis, Sydneys. Son lea beakkán báikái čadnojuvvon installašuvnnain, main lea erenoamáš dovdu, ja intervenšuvnnain, mat čalmmustit šalddi kultuvrraid ja gaskkustanlanjaid gaskka. Jones lea wiradjuri ja kamilaroi.

Duane Linklater lea dáiddár, gii barggustis guorahallá ásahusa ja lanja struktuvrralaš giela, ja lokte oidnosii muitalusaid, mat čájehit kultuvrralaš massimiid, ealáskahttimiid ja suverenitehta. Linklater lea cree-indiána.

Catalina Lozano lea sorjjasmeahttun kuráhtor ja čálli. Son dutká ja bargá kuráhtorin unnit historjjálaš narratiivvaid birra, main eahpidit hegemonalaš máhttohámiid, erenoamážit moderniteahta ii-postmodearna kritihka. Son lea áiddo báliid doaimmahan girjji Crawling Doubles: Colonial Collecting and Affects ovttas Mathieu K. Abonnencain ja Lotte Arndtain. Lozano lea colombialaš.

Anne May Olli jođiha RiddoduottarMuseaid – sámi museaid ja sámi dáiddačoakkáldaga Oarje-Finnmárkkus. Son lea sápmelaš ja badjesogas.

Gerald McMaster lea kuráhtor, dáiddár ja čálli. Son lea OCAD-universiteahta álgoálbmogiid visuála dáidaga ja kritihkalaš kuráhtolaš lohkamiid professor. Sus leat 30 jagi riikkaidgaskasaš vásáhusat ja fágamáhttu dálá áiggi dáidagis, kritihkalaš teoriijas, museadiehtagis ja álgoálbmogiid estetihkas, ja sus leage nana áddejupmi álgoálbmogiid rájáidrasttildeaddji visuála kultuvrras ja kuráhtoriid geavadiin. McMaster lea plains cree ja blackfoot ja lea registrerejuvvon Siksika First Nationis.

Dáiddár Anders Sunna lea sámi dáiddár, gii lea riegádan 1985 Čohkkirasas, Ruoŧa beale Sámis. Sunná bajásšattai badjedilis Kieksiäisvaaras, ja orru dál Johkamohkis. Su dáiddabarggu vuođđun lea sámi álbmoga politihkalaš historjá ja su bearraša 47 jagi bistán nággu Davvi-Ruoŧa boazodoallohálddahusain.


Dutkanprošeakta ”Tanker fra verdens ytterkant. Perspektiver fra nord” (“Jurdagat máilmmi ravddas. Davviguovlluid geahčastat” Doalut gullet viiddis, fágaidgaskasaš ”Tanker fra verdens ytterkant. Perspektiver fra nord” (“Jurdagat máilmmi ravddas. Davviguovlluid geahčastat”) -[E1] dutkanprošektii, mas váldun lea Davvi-Norgga kulturhistorjá, ja maid Office for Contemporary Art Norway (OCA) kuratere. Prošeakta lea strukturerejuvvon máŋggaid guovlluguovdasaš ja riikkaidgaskasaš dialogain ja osolašvuođain, ja das leat iešguđetlágan ovdanbuktinhámit máŋggain báikkiin sihke Norggas ja olgoriikkas –earret eará dutkan, dáiddáriid orrumat, čájáhusat, bargočállosat ja sierralágan doaimmat, maid lágidit OCA pilohttakantuvrras Tromssas ja váldokantuvrras Oslos.

Related